Le 11 e . Traduction ab le nederlandese per le autor mesme.
Ille vespere in le programma Le luce verde del societate nederlandese de television ‘VARA’, il habeva un thema con un representante del organisation de casas de vacantias Landal Greenparks. Ille exclarava que de nunc Landal solmente usara electricitate verde. Excellente idea, io trova, es isto que nos face alsi in casa.
Ma ille anque contava que Landal compra electricitate verde, solo de facilitates de production in Nederland. Hic io non seque. Nam isto ya non es astute!
Per proprie experientia io sape que Landal habe parcos de casas de vacantia placente, etiam in le est e nord de Nederland. Ora vamos supponer que le electricitate que Landal compra pro iste parcos, es producite in turbinas eolic presso le costa de Hollanda, 150 o 200 km remote. Ille distantia non es un grande problema, gratias al cablos a alte tension. Lor alte voltage (per exemplo 400 kV) permitte le transporto a longe distantia, totevia sin grande perditas.
Ma presso le turbinas in le mar, in le west e centro de Nederland, vive multe gente e il ha la multe fabricas e officios. Ergo il es ben possibile que, malgrado le grande numero de turbinas e le vento que es generalmente forte, tote le electricitate assi generate ja es necesse in le vicinitate, toto ja es illac consumite.
Alora pro Landal in le est e nord de Nederland nihil remane. Sed a poco distantia del frontiera al altere latere de illo, in Germania, ubi multo minus gente vive ma il ha multe turbinas eolie, e quasi tote le tectos ha pannellos solar, certo il ha bastante electricitate verde.
Ma non, illo non va, proque Landal solo compra electricitate que es localmente producite, in Nederland. Illo es melior pro le ambiente! Electricitate verde e local.
Ergo le currente eolic german es incombrate al frontiera. Illo ya non es astute, o es?
Felicemente illo non eveni, naturalmente. Tote le retes de electricitate es connectite, e in un tal caso Landal banalmente recipe currente eolic ex Germania. De presso le frontiera o del regiones plus boreal e ventose, presso Danmark. O de Belgica.
Landal etiam habe parcos agradabile in le sud de Nederland, per exemplo un in le vicinitate de Roermond. Alora fornimento de electricitate ex Belgica non es un mal idea. In iste pais, presso Coo, e in Luxemburg presso Vianden, il ha grande centrales de pumpage. Anque istes pote suppler electricitate verde, totevia con perditas de transporto per le distantia. In ultra le pumpar a un nivello elevate require plus energia que resulta de lassar cader le aqua. Le rendimento es minus que 100%, e reguardate momentaneemente illo non es optimal.
Ma proque le electricitate, sin facilitates de stockage, del puncto de vista technic debe ser utilisate immediatemente post le production, le centrales de pumpage tamen es utile e sovente rentabile. Il pote mesmo ser lucrative (financiari- como energeticamente) menar le electricitate toto le distantia a Norvegia, via cablos costose, de que non sin ration plus e plus es collocate. Illac illes plena lacos de barrage, pro lassar les vacuar se de novo quando plus electricitate es necesse que es producite. Iste electricitate retorna tote le distantia per le cablo multo longe.
Sed Landal non usa tal possibilitates. Landal vole solmente comprar currente verde producite in Nederland.
Es illo astute?
Io trova lo un approche pusille, meschin, dismodate, nationalistic. Questiones de energia es preeminentemente apte pro solutiones international, solutiones europee. Que deficites in un pais es supplite per production in un altere, es essential, e precisemente contribue a un production effective e verde. Pensar in un modo limitate non contribue.
E ille replenamento de facto occurre, technicamente viste, si mancipes de energia e productores de programmas imprevidente lo comprende o vole o non. Nam lo que es producite, debe ir usquam, nunc, ora. In le absentia de un alternativa remane inviar le electricitate a Belgica, Norvegia o Suissa. Toto es melior que jectar lo via, que de plus es technicamente impossibile.
A minus que juxta cata turbina eolic e cata pannello solar on vole mitter inutile caldieras electric de aqua, pro dilapidar le electricitate superabundante. Es il isto que nos vole? Alora le consumo es local! Hurra!
Derectos de autor © 2016 de R. Harmsen.