Woke

Le 16 de novembre 2024

Introduction

Le sequente breve texto io typava e publicava spontanee le 12 de novembre in un gruppo de Telegram que intertanto io non plus pote acceder, proque un administrator me ha bannite, cetero sin un ration valide.

Io trova le texto bastante ben scribite, e importante, ergo io lo ora publica in mi proprie sito.

Texto de tunc

Como io lo comprende, woke significa que totes ha le derecto de esser qui illes es, anque si illo devia del ‘normal’ del majoritate. Iste aspecto de ‘woke’ io trova bon. Le acceptation del diversitate.

Ma il ha anque ideas como ‘sexo o genere es un construction social’. Io pensa que non: illo ha un forte base biologic, e toto que es social es basate sur ille biologia.

Woke es anque que personas non-binari etc. (e io crede que illes existe) pote exiger que linguas sia alterate: on besoniarea nove pronomines personal e conjugationes adaptate. Isto me va troppo lontan, io dice: le lingua es como es, e intra illo debe esser trovate solutiones. E.g. un persona non-binari debe seliger illa o ille pro rationes practic, ma ancora pote esser non-binari.

Transgeneres existe, ma io ha forte preoccupationes si infantes es incoragiate de esser trans, e ja es tractate con hormones pro influentiar le disveloppamento de lor corpore (proque plus tarde il serea troppo tarde). Isto es preoccupante, proque le cerebro de juvenes ancora non es plenmente disveloppate, dunque il es possibile que il se tracta de un capricio infantil o puberal, que non justifica mensuras irreversibile.

Ma il ha anque objectiones contra ‘woke’ que io trova nonsensical e insensate, typo Putin e Orbán:

Dar information super homosexualitate etc. non es facer propaganda, e non vole e non pote facer de infantes heterosexual homosexuales. Acceptar cata humano como es, non vole dicer que totes debe devenir como illes.
Information super diversitate, e acceptar humanos in lor diversitate, non menacia le familia, e non menacia le procreation e le subsister del genere human, proque in le practica il ha e habera sempre un grande majoritate del population que es clarmente feminas o homines, le majoritate de illes es heterosexual, e tosto o tarde multe de illes va ingenerar infantes.