Gravitate artificial

Scribite le 15 e 16 de novembre, publicate le .

Viages riscose

André Kuipers es un astronauta nederlandese, qui in 2011 e 2012 viveva alcun menses in le station spatial international ISS. In septembre 2016 Kuipers appareva in le television e contava sur le problemas physic e medic de un sojorno prolongate in un station de spatio.

Le absentia del gravitate in le station orbital causa decalcification ossose e debilitation del musculos. Lo que non es usate, degenera. On desira saper plus de iste effectos, proque si un die on vole viagiar a Marte, on debe maestrar tal problemas.

Proque in un station spatial in un orbita circumterrestre il non ha gravitate, ben que le Terra es presso? Le explication es que le station es in un cadite libere continue. Le station gira circum le terra e cade al terra, ma quando illo ha arrivate a un puncto plus basse, illac le superficie terrestre es etiam plus basse. Assi le station continue a cader, ben que le distantia inter le station e le terra non muta.

Personas e objectos que cade insimul con le station non senti gravitate con respecto al station.

Kermesse

Un die in mi juventute, in le annos 60 del previe seculo, in un large banda de terra ubi olim debe haber essite le muralia, fortification e canales del vetere citate Schiedam, il habeva un kermesse. Un del attractiones esseva un barril, forsan de sex o dece metros in diametro, aperte al parte de supra.

Le publico poteva mirar in le barril e videva la juvenes qui jaceva vertical o stava horizontalmente, verso le pariete del barril. Io habeva forsan septe annos e io lo trovava un miraculo.

Como esseva isto possibile? Le barril tornava rapidemente, que causava un extra fortia gravitational, assi que le resultante con le gravitation existente del terra operava contra le pariete, non plus preter illo. A mesura que le barrica relentava, le direction del gravitate retornava al normal, e le juvenes poteva de novo star al fundo del tonna.

Science fiction

Un altere remembrantia mie, del etate de forsan 10 o 13 annos, esseva que io legeva libros del bibliotheca super le futuro del astronautica e technologia aerospatial, que alora esseva ancora in lor infantia. In le libros on ha speculate super stationes spatial in le forma de un grande anello, con un modiolo e radios como le rota de un bicycletta.

Le idea brillante esseva que le rota poterea rotar, e assi effectuar in le corridor del janta del rota, un gravitate artificial como in le situation terrestre.

Sed es ille gravitate vermente artificial? Si io comprende ben le theorias de Einstein (probabilemente non multo ben), il es impossibile discerner gravitate debite al presentia de massa, como lo del terra, e gravitate in consequentia de acceleration. Acceleration es cata cambia del velocitate. Frenar e ir plus rapide es acceleration (negative o positive), ma alterar le direction del motion etiam lo es.

Assi un gravitate a causa de girar un rota non es artificial, ma es tanto natural como lo que es causate per le massa de un corpore celestial.

Quante giration?

Como rapide debe girar un rota pro realisar un gravitation como sur terra? Illo seque del formulas pro le fortia centripete.

F = mv²/r e F = mω²r. Anque vale secundo Newton que F = ma, ergo le acceleration es a = ω²r, e ω = √(a/r). In iste formulas v es le velocitate linear, preter le orlo del anello, e ω es le velocitate angular.

ω = 2πf = 2π/T, ubi f es le frequentia (numero de rotationes per secunda) e T le periodo del rotation, le duration de cata torno. Dunque ab ω = √(a/r) seque T = 2π/√(a/r).

Le gravitate sur terra es quasi 10 m/s², que significa que pro simular lo in un anello con un radio de 10 metros, on debe lassar facer le station spatial 1 giration in cata 6 secundas approxi­mate­mente. Si le radio es 3 metros e le diametro 6 metros, le periodo de rotation es circa 3,5 secundas.

Proque non?

Proque hodie on non seque le simplice idea del libros de mi juventute? Un station orbital con le forma de un grande rota tornante?

Forsan illo facerea le stationes troppo grande e caro. Forsan on face experimentos scientific que es impossibile sur terra proque illos require le absentia del gravitate.

Io non lo sape.

Cosmologia

Le scientista nederlandese Erik P. Verlinde desde 2009 developpa un nove theoria de gravitate. Su idea es que gravitate non es un fortia fundamental, mais un protesta de information contra displaciamentos. Ille propone un gravitate entropic e holographic. Io non pretende completemente comprehender lo.

Un forte del theoria es que illo non assume le materia e energia obscur como require le theorias traditional.

Recentemente Verlinde presentava un nove libro super le thema, con le titulo anglese “Emergent Gravity and the Dark Universe”, Gravitate Emergente e le Universo Obscur.

Un introduction in nederlandese termina con le suggestion que per su theorias, Erik Verlinde forsan poterea ser mentionate in futur manuales de historia, como “le nove Einstein”.


Nota del 18 de augusto 2019

Le adresse del terreno del kermesse esseva le Emmaplein (Placia de Emma), dice nos iste pagina Facebook.


Nota del 3 de junio 2022

An poterea iste photo de 1958 monstrar le barril, in le parte dextere del photo? Secundo mi memoria, le barril non esseva tan alte. Sed il sembla plausibile.


Derecto de autor © 2016, R. Harmsen, tote derectos de copia reservate, all rights reserved.