Le 27 e
“Da che cosa ricavate l'inossidabile certezza che l'informazione mainstream sia indipendente da politica e capitale al punto da fidarvi ciecamente della narrazione ufficiale e unanime, qualunque essa sia?”
‘De que cosa vos deriva le inoxydabile certitude que le information mainstream serea independente del politica e capital, usque al puncto de fider vos cecamente al narration official e unanime, quecunque iste sia?’
Io ha necun certitude. Nihil es certe in iste vita. Ma il ha expectationes e probabilitates realistic.
Ja desde circa 2006, ergo ora 15 annos, io ha experientia con le media non-mainstream, le medios que mesme se ha designate “alternative”. E io ha vidite articulos prejudiciate, paranoide, infamante, calumniose, seditiose, e io ha vidite un carentia de nuance, accuratessa, conscientiositate, honestate, transigentia, e le inclination de acceptar critica. Il habeva fallacias e sophismos. A vices anque antisemitismo e homophobia.
Dunque io prefere clarmente e decisemente le medios mainstream. Sed alcunes de illos es a vices pigre e indolente, in mi opinion, e prefere copiar notitias de pressa a mesme investigar cosas. Que es bon es que iste medios regular separa factos de opiniones, que pote facilemente irritar personas que mesme habe forte opiniones, como anque io. Tamen le separation es un bon principio, totalmente non adherite per le medios alternative.
Ubi le question de Paolo Castellina demanda si le medios es independente del politica e capital, naturalmente le puncto es: de ubi veni le moneta. Il ha medios commercial, que vive de reclamo, e il ha medios que recipe (anque o solo) moneta del stato. In ambe casos il ha statutos de redaction, pro garantir que jornalistas pote facer lor labor independente- e liberemente. Io pensa que illo sovente functiona, ben que, como io ja ha scribite plure vices, nihil in iste mundo e vita es 100% ideal e perfecte.
E medios statal e medios commercial vole haber multe lectores, ascoltatores, spectatores, specialmente le medios commercial, proque assi le precio de messages publicitari monta. De isto on poterea expectar que medios commercial prefererea theorias complotista, que sovente contine multe phantasia e elementos bizarre, captivante e excitante. In comparation, le “narration official e unanime” es subinde fastidiose, enoiose, tediose, monotone e insipide, non pote inspirar multes, e non pote attraher le interesse de grande massas del publico.
Tamen le medios commercial seriose non supporta le adherentes de theorias de conspiration.
Al minus in mi pais, Nederland, il ha mainstream media que non hesita criticar le comportamento del governamento. Le assi appellate Toeslagenaffaire esseva disvelate anque per investigationes e publicationes del gazetta Trouw (de character christian-protestante, financiate via abonamentos e annuncios), e RTL Nieuws, le redaction de notitias del station televisive commercial RTL.
Iste Toeslagenaffaire se tracta de subsidios statal pro parentes laborante, qui ha infantes qui va in un crèche. Le subsidios depende del receptas del parentes e del numero de horas que le infante(s) es in le crèche. Si il habeva errores in le datos fornite per le parentes, anque si era parve, multe vices omne subsidios de un integre anno, o mesmo multe annos, esseva revindicate, que causava grande problemas financiari, e indirectemente altere problemas.
Un altere thema: io me memora que le jornalista nederlandese Joris Luyendijk, qui viveva longe tempore in London, contava que le Brexit esseva fortemente stimulate per un torrente de information incorrecte super le organisation e functionamento del Union Europee. Information fornite per partes del mainstream media de Britannia. Mesme io non ha legite iste medios.