Idea del 3 de junio 2011 e avante, texto del 22, 25, 26 e
Nos ama campar, a causa del proximitate del natura, de litteralmente sentir e olfacer le stirpettas de herba, per le retornar al mer necessitates del vita, e pro appreciar de novo plus clarmente le conforto que nos ha in casa. Cata qualque dies in un nove ambiente e situation, ben que illos tote son simile, pro revenir in le stabilitate del cognite post qualcun septimanas, essente felice pro e le esser e le haber essite.
Obviemente in tempores e regiones de siccitate on sparnia le aqua. In campings le technica con illo adjuva. Quasi ubique on ha montate valvulas con buttones de pression. Post premer le button, le aqua flue durante un tempore preadjustate, per exemplo dece secundas. Illo es bon contra dilapidatores qui forsan lassa le aqua fluer durante tote le tempore de su presentia, o mesmo oblida clauder le valvula quando quita le loco pro lavar le plattos o se mesme.
Ma pro qui es ja mesme inclinate a sparniar aqua, iste typo de valvulas de facto mena a plus e non minus profusion de aqua. Per exemplo como nos como infantes apprendeva brossar se le dentes, comenciava con mitter un poco de dentifricio al brossa de dentes, e molliar los sub le jecto de aqua. Illo functiona ben si le pression del aqua es normal o basse. Ma a vices, mesmo sovente, in campings le pression es extrememente alte e le jecto forte, de sorta que iste procedimento de cautemente humectar brossa e pasta de dentes, resulta in un perdita quasi total del pasta.
Provenite illo, nos brossa alcun secundas, durante que le aqua flue futilemente, e pois nos rincia le brossa. Exactemente in iste momento, le jecto sempre ha stoppate e nos debe poner lo in marcha per de novo premer le button. Alora un nove fluxo limitate sparniante, mais in major parte jectate via inutilemente, es inchoate pro ser plure vices iterate.
Le traditional un o alcun gorgatas de aqua como ritual de finalisar le brossar, pro rinciar le bucca, es difficile con aqua de pression extreme: le velocitate del fluer es talmente que biber es practicamente infacibile. Le aqua escappa al ser potate!
Un valvula con un button rotatori, como nos ha in casa, que on pote aperir e clauder secundo requirimento, pro nos esserea multo plus confortabile e lassarea nos sparniar multo plus aqua que con le buttones de pression. Ma esque illo contrapesarea le dissipation del poches, qui non sape clauder un valvula, e per causa de valvulas que ha un fuga o non es completemente clause o que ha un juncto defectuose, io non sape.
Le previe es basate sur experientias con campar in Europa durante plus de cinquanta annos. Alcun typos de valvulas con button de pression on pote stoppar per traher in vice de premer. Sed illo non succede con omne sortas.
Un discoperta recente es que repremer le button stoppa le passar del aqua e del tempore: brevemente laxar le button produce le parve quantitate de aqua requirite. Ma illo tamben non es un possibilitate universal de omne tappos.
Un tendentia moderne es que le tappos pro lavar plattos, vestimentos o corpores solo offere aqua calide, e non frigide. Aqua frigide solo veni ex tappos special pro plenar un reservoir. Illo sembla adder al conforto del camping, ma pro me de facto non lo face: brossar le dentes con aqua calide non me place, e rinciar le spuma del plattos e altere utensiles del tabula, pro alcun ration io face preferentemente con aqua frigide. Le mesme es ver de aqua pro biber.
E si on arriva in un camping in un die calide, forsan a tres o quatro horas del postmeridie, on deberea non cercar un unic valvula special que da aqua frigide pro jectar sur le capite e camisa! Ergo le melior solution es: aqua calide in le duchas, aqua calide e frigide in le cubiculos pro lavar se (preferibilemente con valvulas a miscer), e aqua frigide con le cuppas pro lavar plattos e pro lavar vestitura, con punctos separate in le vicinitate pro extraher aqua ben calide, pro versar in un proprie cupetta.
Assi on sparnia non solo le aqua mesme e le energia requirite pro le depuration del aqua, ma alsi le energia pro calefacer le aqua, ben que iste energia io videva in ja un camping esser fornite per un boiler solar.
Varie altere inconvenientes del equipamento sanitari de campings, que nonobstante non del toto pote impedir le placer de campar:
Speculos sovente es montate tan basse que personas de alco alte statura non pote vider lor visage, per exemplo pro rasar se, sin inclinar se o genuflecter. Naturalmente isto es melior que le situation que personas de basse statura debe saltar in alto, cercar un scabello, o montar super le lavamanos.
Ver solution: speculos de statura alte. Ma isto costa pecunia.
Le tappos de alcun lavamanos es si presso le bordo, que le manos non va ben sub le aqua.
Super le lavamano o bassino il ha un planchetta a vices tan stricte que un necessaire, que forsan contine objectos relativemente pesante como un rasorio, facilemente cade del planchetta e in le cupetta.
Cabinas de duchas generalmente habe duo compartimentos, un pro duchar, le altere pro disvestir, siccar e vestir se. In le compartimento pro duchar multe vices il ha nihil pro deponer alco: sapon, spuma de banio e shampoo o quecunque on vole usar, an on los debe mitter sur le solo?
In le altere spatio il ha forsan un o duo buttones pro appender vestimentos, o un button e le altere rumpite, sovente ambe troppo grande pro le nodos al vestimentos. Planchettas troppo parve e stricte pro deponer cosas, a vices placiate assi que illos es irrorate per le aqua del ducha.
Capite de ducha tro basse (batter le testa, o lavar se le capillo prosternante se); capite de ducha tro alte (aqua ja frigide quando arriva al corpore); capite de ducha inadjustabile e inmovibile, jectos presso le pariete o tro lontan de illo; capite de ducha mal fixate, ergo salta in omne e nulle directiones.
Capite de ducha non distachabile, de modo que dirigitemente rigar partes del cubiculo o del corpore non es facibile.
Le vita de un campator es terribilemente penibile, dur e quasi insupportabile.
No.
Derecto de autor © 2017, R. Harmsen, tote derectos de copia reservate, all rights reserved.